Амьдрах орон зай хүн бүхэнд бий. Харин хэрхэн чанартай амьдрах вэ гэдэг сонголт л хүмүүсийг өөр өөр түвшинд аваачаад байх шиг. Бидний анхдагч хэрэгцээ хангагдаж байж дараагийн түвшинд буюу тав тух, гоо зүй, сэтгэл ханамжийг эрэлхийлж чаддаг. Гэр орон бол ганц амьдрах орон зай биш, амьдралын чанарыг илэрхийлдэг хамгийн чухал газар. Тиймээс интерьер, тавилгын шийдлийг сонгохдоо харагдах байдлаас илүү, дотоод чанар, эдэлгээ, хэрэглээний тав тухыг хамтад нь бодолцох шаардлагатай.
Ихэнх хүмүүс тавилга хийлгэх эсвэл худалдан авахдаа хамгийн түрүүнд өнгө, материал, загварт анхаараад байдаг. Харин нүдэнд шууд харагддаггүй ч өдөр бүр хамгийн их ажилладаг нэг чухал хэсгийг орхигдуулдаг нь тавилгын тоноглол юм. Тавилгын тоноглол гэдэг нь шургуулгын зам, хаалганы нугас, өргөх механизм, гүйдэг хаалганы зам зэрэг тавилгын хөдөлгөөн, ажиллагааг бүрдүүлдэг үндсэн эд ангиуд юм. Энэ жижиг мэт харагдах хэсгүүд л тавилгын чанарыг тодорхойлж, олон жилийн турш асуудалгүй ашиглах боломжийг бүрдүүлдэг.
Нөгөөтээгүүр мөнгөө хэмнэх шаардлага гарсан үед хүмүүс хамгийн түрүүнд тоноглолын хэсгээс хасах гээд байдаг. Гэвч энэ нь урт хугацаандаа хамгийн буруу шийдвэрүүдийн нэг болдог. Учир нь чанар муутай тоноглол нь нэг хоёр жилийн дараагаас л хаалга нь гажиж унжих, шургуулга нь гацаж, дуу орсноор эцэст нь дахин засвар хийх, солих зардлыг бий болгодог.
Харин чанартай тоноглол сонгосноор тавилга олон жил найдвартай ажиллана. Нэг хөдөлгөөнөөр зөөлөн хаагдах шургуулга, хуруу хүрэх төдийд жигд нээгдэх хаалга, орон зайг ухаалгаар ашиглах механизм нь тав тухыг мэдрүүлж өдөр тутмын амьдралыг илүү амар болгодог.
Товчоор хэлэхэд тавилгын жинхэнэ үнэ цэнэ нь зөвхөн гадна харагдах гоо сайханд биш, харин дотор нь ажиллаж байгаа ухаалаг технологи ба найдвартай механизмд оршдог. Тиймээс тавилга хийх эсвэл сонгох үед нэг зүйлийг мартаж болохгүй.
Материал, дизайн, өнгө бүгд солигдож болно. Харин чанартай тоноглол бол танаж үл болох хөрөнгө оруулалт байх болно. Сайн тоноглолтой тавилга бол зөвхөн гарт баригддаг эд зүйл биш. Тэр бол гэрийн тав тух, өдөр бүрийн амьдралын чанарыг дэмждэг чимээгүй технологи юм.